اداکار آغا علی نےدوسری شادی کی خبروں کی تردید کر دی

لاہور(ویب ڈیسک)پاکستانی ڈرامہ انڈسٹری کے معروف اداکار آغا علی نے اپنی دوسری شادی کی خبروں کی تردید کرتے ہوئے سوشل میڈیا پر ویڈیو بیان جاری کردیا۔
رپورٹ کے مطابق اداکار آغا علی نے اپنی انسٹاگرام سٹوری میں ویڈیو شیئر کی تھی جس میں اُنہوں نے سیاہ رنگ کی شیروانی اور سر پرگِرے رنگ کا قلا پہنا ہوا تھا، اس ویڈیو میں اداکار نے کہا تھا کہ ’ایک بار پھر‘۔
آغا علی کی یہ ویڈیو جیسے ہی سوشل میڈیا پر وائرل ہوئی تو یہ خبر گردش کرنے لگی کہ آغا علی نے اداکارہ حنا الطاف کو طلاق دے کر دوسری شادی کرلی ہے۔
افواہوں سے تنگ آکر بالاآخر آغا علی نے خاموشی توڑ دی اور اپنی انسٹاگرام سٹوری میں ایک اور ویڈیو جاری کردی جس میں اُنہوں نے دوسری شادی کی افواہوں کی تردید کی۔
آغا علی نے اپنے وضاحتی بیان میں دوسری شادی کی خبروں کی تردید کرتے ہوئے کہا کہ الفاظ ’ایک بار پھر‘ کہنے کا مطلب یہ تھا کہ میں ایک بار پھر ڈرامے میں شادی کرنےلگا ہوں۔
اداکار نے کہا کہ یہ بات تو سب کو ہی معلوم ہے کہ ہم اداکاروں کی ڈراموں میں کئی بار شادی ہوتی ہے لیکن جب میں نے اپنی ویڈیو سے متعلق یہ افواہ دیکھی کہ میں دوسری شادی کررہا ہوں تو میں نے وضاحت دینا ضروری سمجھا۔
اُنہوں نے کہا کہ انسٹاگرام کے جس نامور پیچ نے میری ویڈیو شیئر کی،انہوں نے یہی ظاہر کیا کہ میں نے دوسری شادی کرلی ہے تاکہ لوگ ویڈیو دیکھ کر غلط فہمی کا شکارہوجائیں۔
آغا علی نے کہا کہ میں یہاں واضح کرنا چاہتا ہوں کہ میں نے حقیقی زندگی میں نہیں بلکہ ڈرامے میں شادی کی ہے لہٰذا کوئی بھی غلط فہمی کا شکار نہ ہو۔
اداکار نے غلط معلومات پھیلانے والوں کو مشورہ دیتے ہوئے مزید کہا کہ آپ لوگ اپنی شادیوں کی فکر کریں، میری کیوں اتنی ٹینشن لیتے ہو؟

اس خبر پر اپنی رائے کا اظہار کریں

اپنا تبصرہ بھیجیں