لاہور(نیوزٹویو) پاکستان کرکٹ بورڈ نےبابر اعظم کے مستعفیٰ ہونےکےبعد قومی ٹیم کے نئے کپتانوں کا اعلان کردیا ہے کرکٹ بورڈ نے شان مسعود کو ٹیسٹ ٹیم کا کپتان جبکہ شاہین شاہ آفریدی کوٹی20 ٹیم کا کپتان مقررکیاگیا ہے پاکستان کرکٹ بورڈ کی جانب سے و ن ڈے ٹیم کے کپتان کے نام کا اعلان فی الوقت نہیں کیا گیا۔
دریں اثنا کوچنگ اسٹاف میں بھی تبدیلی کرتے ہوئے محمد حفیظ کو ٹیم ڈائریکٹر بنا دیا گیا ہے۔
واضح رہے کہ سابق کپتان بابر اعظم نے ورلڈ کپ میں قومی ٹیم کی ناقص پرفارمنس کے بعد آج تینوں فارمیٹس کی قیادت سے استعفیٰ دے دیا تھا۔ان کے اس اعلان کی کچھ دیر بعد پاکستان کرکٹ بورڈ نے ٹیسٹ اور ٹی20 ٹیم کے کپتانوں کا اعلان کردیا ۔
پاکستان کرکٹ بورڈ نے شان مسعود کو پاکستان کی ٹیسٹ ٹی کی قیادت سونپی ہے جبکہ شاہین شاہ آفریدی کو ٹی20 ٹیم کا کپتان مقرر کیا ہے۔
شان مسعود اور شاہین شاہ آفریدی بین الاقوامی سطح پر ٹیم کی قیادت کا تجربہ نہیں رکھتے لیکن دونوں کو ڈومیسٹک اور ٹی20 میں ٹیم کی قیادت کرنے کا کافی تجربہ ہے۔ شان مسعود پاکستان سپر لیگ کی ٹیم ملتان سلطانز کی قیادت کر چکے ہیں جبکہ شاہین شاہ آفریدی لاہور قلندرز کے کپتان ہیں اور ان کی قیادت میں قلندرز نے چیمپیئن بننے کا اعزاز بھی حاصل کیا تھا۔
شان مسعود کو منصب سنبھالتے ہی اہم کڑے امتحان کا سامنا ہو گا کیونکہ پاکستان کی ٹیم تین ٹیسٹ میچوں کی سیریز کھیلنے کے لیے آسٹریلیا جائے گی جہاں اسے گزشتہ 14 ٹیسٹ میچوں میں مسلسل ناکامی کا سامنا کرنا پڑا ہے۔
ٹیسٹ سیریز کے بعد گرین شرٹس نیوزی لینڈ جائیں گے جہاں قومی ٹیم شاہین شاہ آفریدی کی قیادت میں پہلی بار ٹی20 سیریز کھیلے گی۔
پاکستان کرکٹ بورڈ نے ایک اور اہم تبدیلی کرتے ہوئے ڈائریکٹر مکی آرتھر سمیت قومی ٹیم کے کوچنگ اسٹاف کا پورٹ فولیو بھی تبدیل کردیا ہے۔
بورڈ کی جانب سے جاری بیان کے مطابق تمام کوچز نیشنل کرکٹ اکیڈمی میں کام کرتے رہیں گے اور پاکستان کرکٹ بورڈ دورہ آسٹریلیا اور نیوزی لینڈ کے لیے کوچنگ اسٹاف کا اعلان جلد کرے گا۔
بعدازاں بورڈ کی جانب سے جاری ایک اور پریس ریلیز میں اعلان کیا گیا کہ محمد حفیظ پاکستان کرکٹ ٹیم کے ڈائریکٹر مقرر کردیے گئے ہیں۔ محمد حفیظ نے 55 ٹیسٹ، 218 ون ڈے اور 119ٹی20 انٹرنیشنل میچوں میں پاکستان کی نمائندگی کرتے ہوئے مجموعی طور پر 12ہزار 780 رنز بنائے اور253 وکٹیں حاصل کیں۔ ورلڈ کپ سے قبل حفیظ پاکستان کرکٹ بورڈ کی ٹیکینکل کمیٹی کے رکن بھی رہ چکے ہیں۔
