وزیراعظم کا چینی کی ذخیرہ اندوزی میں ملوث شوگرملوں اور دیگر عناصر کے خلاف کارروائی کا حکم

اسلام آباد(نیوزٹویو) وزیر اعظم عمران خان نے چینی کی ذخیرہ اندوزی اور ناجائز منافع خوری میں ملوث شوگرملوں اور دیگرعناصر کے خلاف سخت قانونی کارروائی کا حکم دیدیا ہےجس کے بعد پنجاب حکومت نے قوانین کی خلاف ورزی میں ملوث شوگر ملز مالکان اور ملازمین کے خلاف کریک ڈاؤن شروع کردیا ہے جمعہ کو وزیراعظم کی صدارت اجلاس میں چینی کی قیمت فروخت اور ذخیرہ اندوزی کے خلاف اقدامات پر غور کیا گیا اجلاس میں وزیر اعلیٰ پنجاب سردار عثمان بزدار، مشیر برائے احتساب مرزا شہزاد اکبر، ڈاکٹر شہباز گل ، سینئر افسران نے شرکت کی جبکہ صوبائی وزیر صنعت اسلم اقبال اور چیف سیکریٹری نے ویڈیو لنک کے ذریعے شرکت کی۔وزیر اعظم نے چینی ذخیرہ اندوزی اور ناجائز منافع خوری کے خلاف سخت قانونی کارروائی کا حکم دیتے ہوئے کہا کہ شوگر ملوں کی نگرانی کے لیے ٹریک اینڈ ٹریس سسٹم کا نفاذ یقینی بنایا جائے، اس طرح چینی کی اصل پیداوری مقدار کا پتا چلایا جا سکے گا۔انہوں نے کہا کہ ناجائز منافع کمانے والے غریب عوام کے دشمن ہیں، ریاست ان عناصر کے خلاف سخت کارروائی کرے گی۔

چیف سیکرٹری پنجاب نے کہاکہ ذخیرہ اندوز اور ناجائز منافع خوروں کے خلاف قانونی چارہ جوئی شروع ہے۔ پنجاب شوگر ملوں پر سی سی ٹی وی کیمرے بھی نصب کیے گئے ہیں

اس خبر پر اپنی رائے کا اظہار کریں

اپنا تبصرہ بھیجیں