اسرائیلی لڑاکا طیاروں کی غزہ میں بمباری سے چھے بچے اور 2 خواتین سمیت مزید 19 فلسطینی شہید ہو گئے جس کے بعد اسرائیلی فوج اور حماس کے درمیان اب تک ہونے والی لڑائی کے نتیجے میں اب تک 139فلسطینی شہید ہو چکے ہیں جب کہ 830 فلسطینیوں کو زخمی حالت میں مختلف ہسپتالوں میں منتقل کردیا گیا ہے۔ اسرائیلی بمباری سے سیکڑوں عمارتیں ملبے کا ڈھیر بن گئی ہیں مقبوضہ مغربی کنارے میں فائرنگ سے شہدا کی تعداد 11 ہو گئی۔ فلسطینی وزارت صحت کے مطابق بمباری کے نتیجے میں ایک ہزار سے زائد فلسطینی زخمی ہو چکے ہیں۔ ہزاروں فلسطینی بے گھر ہو گئے۔غزہ کے شمال مشرقی علاقوں میں اسرائیلی حملوں کے پیش نظر شہریوں نے نقل مکانی شروع کر دی۔ عرب میڈیا کے مطابق اسرائیل نے فلسطین پر زمینی آپریشن شروع کردیا ہے اور بھاری اسلحہ اور ٹینکوں کےساتھ پیش قدمی کا آغاز کر دیا ہے زخمیوں کی بڑھتی ہوئی تعداد کے باعث اسپتالوں میں مزید زخمیوں کو داخل کرنے کی گنجائش ختم ہو گئی ہے جس کی وجہ سے ابتر صورتحال مزید گھمبیر ہو گئی ہے۔غزہ میں اسرائیلی حملے میں قومی پروڈکشن بنک کی عمارت مکمل طور پر تباہ ہوگئی ہے۔العربیہ اورالحدث ٹی وی چینلوں کے مطابق جمعہ کے دن غزہ کی سرحد پر اسرائیلی فوج کی بڑی تعداد کو سرحد پر جاتے دیکھا گیا ہے۔جبکہ عالمی ذرائع ابلاغ کےمطابق اسرائیلی فوج نے جمعہ کے روز جنوبی غزہ میں خان یونس کے کئی مقامات پر بمباری کی ہے۔ اسرائیلی فوج نے بندرگاہ کے قریب پولیس کے ہیڈا کوارٹر کو بھی نشانہ بنایا ہے۔سرائیلی فوج نے غزہ کی پٹی میں الشجاعیہ کے مقام پر حماس کے ایک گروپ کو بھی نشانہ بنایا ہے۔غزہ کی پٹی میں اسپتال زخمیوں سے بھر گئے ہیں اور ان کے پاس مزید زخمیوں کےعلاج کے لیے گنجائش ختم ہو گئی ہے۔
عرب میڈیا کےمطابق مطابق غزہ کی پٹی سے فلسطینی مزاحمت کاروںنے یہودی کالونیوں پر بھی متعدد راکٹ داغے ہیں غزہ کی شمالی سرحد پر اسرائیلی فوج نے بھاری توپ خانہ اور ٹینک منتقل کردیے ہیں جس کے بعد کسی بھی وقت بڑی کارروائی شروع ہوسکتی ہے۔اسرائیل کے عبرانی ٹی وی چینل 12 کے مطابق اسرائیلی فوج کے ایک عہدیدار نے بتایا ہے کہ تازہ بمباری میں حماس کے 20 سرکردہ رہنمائوں کو قتل کردیا گیا ہے۔ اس کے علاوہ غزہ کی پٹی میں میزائل سازی کے بیشتر نیٹ ورک اور سرنگیں تباہ کردی گئی ہیں۔عرب میڈیا کے مطابق حماس کے القسام بریگیڈ نے صحرائے نقب میں اسرائیل کے ایک کیمیائی کار خانے پر خود کش ڈرون طیاروں سے حملہ کرنے کا دعویٰ کیا ہے تاہم اسرائیل نے کہا ہے کہ اس نے حماس کے متعدد خود کش ڈرون مار گرائے ہیں۔العربیہ کے مطابق گذشتہ شب حماس کی طرف سے اسرائیلی علاقوں پر 200 راکٹ داغے گئے ہیں اسرائیلی فوج نے کہا ہے کہ گذشتہ پیر سے اب تک غزہ کی پٹی سے 2 ہزار گولے یا راکٹ داغے گئے ہیں نہتے
فلسطینی اسرائیلی توپ خانے کے حملوں سے بچنے کیلئے اقوام متحدہ کے اسکول میں پناہ لے رہے ہیں۔ اب تک اسرائیل غزہ میں 800 سے زائد مقامات کو نشانہ بنا چکا ہے۔فلسطین میں پیرا میڈیکل اسٹاف کی ویڈیو سوشل میڈیا پر وائرل ہو رہی ہے جس میں وہ معصوم بچوں کی لاشیں دیکھ کر جذبات پر قابو نہیں رکھ پا رہے فلسطینیوں پر اسرائیلی مظالم کےخلاف لبنانی عوام کا احتجاج جاری ہے۔ سیکڑوں افراد نے اسرائیلی سرحد پر احتجاجی مظاہرہ کیا اور ناجائز اسرائیلی ریاست کے خلاف شدید نعرے بازی کی۔ اسرائیلی فورسز نے سرحد پار پُر امن مظاہرہ کرنے والوں پر بھی فائر کھول دیے۔ اسرائیلی فورسز کی فائرنگ سے دو افراد جاں بحق اورمتعددزخمی ہو گئے
