وزیر مملکت اطلاعات و نشریات فرخ حبیب نے کہا ہے کہ بلاول زرداری لوٹ مار اور چھینا جھپٹی کی سیاست کے وارث ہیں، بلاول کیلئے فلاحی ریاست کے تصور کو سمجھنا ناممکنات میں سے ہے،عمران خان نے “احساس” کے ذریعے عوام کو ریاست کے نئے تصور سے روشناس کرایا۔ جمعرات کو وزیر مملکت فرخ حبیب نےبلاول زرداری کے بیان پر ردعمل میں کہا کہ فرزند زرداری کی جماعت کی معاشی حکمت عملی لٹیروں کی تجوریاں بھرنے تک محدود تھی، عمران خان کورونا وائرس کی وباء کے باوجود غریبوں کی فلاح کو معاشی حکمت عملی کا محور بنائے ہوئے ہیں۔ انہوں نے کہا کہ بلاول زرداری کے اتحادیوں نے ملک کو دیوالیہ پن کی دہلیز پر چھوڑا، عمران خان نے بلاول زرداری کے اتحادی شریف خاندان کی آلائشوں سے معیشت کو پاک کیا۔ انہوں نے کہا کہ ملک سے بھاگنے والے بھی ہم نہیں بلاول زرداری کے اتحادی ہیں، منی لانڈرنگ اور لوٹ مار کی دولت باہر بھجوانے کی رسم بلاول اور اسکے اتحادی شریفوں نے پروان چڑھائی۔ انہوں نے کہا کہ سندھ کے اندر 14 ارب کی گندم خود غائب کرکے نام چوہوں کا لگا دیا جاتاہے،سندھ حکومت نے 5 ارب روپے کووڈ ریسپانڈ کے لئے بجٹ میں مختص کئے تاہم چھ ماہ میں ایک پیسہ بھی خرچ نہیں کیا گیا۔ انہوں نے کہا کہ گزشتہ 10 سالوں میں بجلی اور گیس کے شعبے میں ہونے والی کرپشن کا خمیازہ آج عوام بھگت رہے ہیں، عمران خان اپوزیشن میں تھے تو اپنی عمر بھر کی کمائی پاکستان لے کر آئے۔ انہوں نے کہا کہ آج سمندر پار پاکستانی عمران خان پر اعتماد کے باعث ریکارڈ ترسیلات پاکستان بھجوا رہے ہیں، بلاول زرداری فکر نہ کریں، چور بازاری کا سلسلہ دوبارہ شروع نہ ہوپائے گا۔ اُنہوں نے کہا کہ جلد یا بدیر قوم کا لوٹا گیا مال واپس کرنے کے علاوہ ان کے پاس کوئی چارہ نہیں۔
