وفاقی کابینہ نے تحریک لبیک پاکستان کی پابندی کے خاتمےکے لیے دی جانے وا لی درخواست پر وزارتِ داخلہ کی کمیٹی بنانےاور پاک افغان ٹرانزٹ معاہدے میں 6 ماہ کی توسیع سمیت ملک بھر کے کنٹونمنٹ بورڈز میں انتخابات کرانے کی منظوری دے دی ہے جبکہ کا بینہ نے کورونا سے متعلق امدادی سامان بوسنیا بھیجنے کی بھی منظوری دی ہے ۔فوادچودھری نے وفاقی وزیراسد عمر کے ہمراہ کا بینہ فیصلوں سےمتعلق بریفنگ دیتے ہوئےبتایا کہ الیکٹرانک ووٹنگ مشینوں پر الیکشن کمیشن کی رپورٹ پر تشویش کا اظہار کیا۔ اوور سیز پاکستانیز کو ووٹ کا حق دینا تحریک انصاف کا ایجنڈا ہے۔ الیکشن کمیشن کو اوورسیز پاکستانیز کو قومی دھارے میں لانے کیلئے اقدامات کرنے چاہئیں۔انہوں نے کہا کہ ملک معاشی سطح پر استحکام کی طرف بڑھ رہا ہے، فلسطین کے مسئلے کو عالمی سطح پر اُجاگر کرنے پر وزیر خارجہ شاہ محمود قریشی کی کوششوں کو سراہا گیا۔ مسئلہ کشمیر پر ہونیوالی پیش رفت پر بھی وزیر خارجہ اور ان کی ٹیم کی کارکردگی کی تعریف کی انہوں نے بتا یا کہ کابینہ نے کورونا کے حوالے سے طبی امداد اور ادویات بوسنیا بھجوانے کا فیصلہ کیا ہے۔ کابینہ نے این ٹی ڈی سی کے ایم ڈی کی عارضی ذمہ داریاں محمد ایوب کو دینے کی منظوری دیدی۔
وزیر اطلاعات نے کہا، ٹی ایل پی کی پابندی ختم کرنے کی درخواست ریویو کمیٹی کو بھجوا دی گئی ہے۔ کابینہ نے کنٹونمنٹ بورڈز کے انتخابات کرانے کی منظوری دی ہے۔ پی ڈی ایم اب بکھر کر رہ گئی ہے۔ کوئی بھی اس اتحاد کو سہارا نہیں دے سکتا۔
وفاقی وزیر اسد عمر نے بریفنگ دیتے ہوئے کہا، کورونا کے دوران وزیراعظم کے اقدامات سے معیشت نے ترقی کی، دنیا نے تسلیم کیا کہ کورونا کے دوران پاکستان نے بہتر اقدامات اٹھائے۔ کورونا کے دوران احساس پروگرام کے تحت ایمرجنسی کیش کے تحت 200 ارب روپے تقسیم کیے گئے۔اُنہوں نے کہا، وزیراعظم نے کورونا کے دوران کمزور طبقے کیلئے بہترین اقدامات کیے۔ اسٹیٹ بینک نے کورونا کے دوران بہترین اقدامات اُٹھائے بیرون ملک پاکستانی ریکارڈ ترسیلات زر ملک میں بھیج چکے ہیں، گندم، گنا، مکئی اور چاول کی ریکارڈ پیداوار ہوئی۔ معاشی استحکام کے اثرات سب کو نظر آ رہے ہیں۔
