لاہور قلندرز کی نمائندگی کرنے والے قومی کرکٹ ٹیم کے فاسٹ بولر شاہین شاہ آفریدی نے پاکستان سپر لیگ (پی ایس ایل) کے بقیہ میچز میں اچھا پرفارم کرنے کا عزم کرلیا۔ لاہور قلندرز کے نائب کپتان کا کہنا تھا کہ وہ پانچویں ایڈیشن کی طرح چھٹے ایڈیشن میں بھی ٹاپ وکٹ ٹیکر کے طور پر سیزن ختم کرنا چاہیں گے۔انہوں نے کہا کہ پچھلے پی ایس ایل میں وہ 17 وکٹوں کے ساتھ ٹاپ وکٹ ٹیکر تھے، اس بار چار میچز میں آٹھ وکٹیں حاصل کی ہیں اور ابھی دوسرے نمبر پر ہیں کوشش ہے کہ کارکردگی کے اس سلسلے کو جاری رکھتے ہوئے سیزن کا اختتام ایک بار پھر بہترین اور کامیاب بولر کے طور پر کریں۔ شاہین شاہ آفریدی کا کہنا تھا کہ کوشش یہی ہوگی کہ جیسا کراچی میں اسٹارٹ کیا تھا اس کو ہی جاری رکھیں گے، پہلے دو میچز اسلام آباد اور پشاور کے ساتھ ہیں، یہ دونوں میچز لاہور قلندرز کیلئے بہت اہم ہیں، ابھی ٹاپ فور میں ہیں، پہلا ہدف ٹاپ ٹو میں جگہ پکی کرنا ہے اور پھر آگے جانا اور ٹرافی اٹھانا ہے۔انہوں نے کہا کہ وکٹ لینا یا نہ لینا میرے ہاتھ میں نہیں ہوتا ، میرے ہاتھ میں صرف اپنی طرف سے سو فیصد دینا ہے جو میں ضرور دوں گا۔
