فرانس(نیوز ڈسک) فرانسیسی صدر سے بچی نے معصومانہ سوال کرتے ہوئے کہا تھپڑ کھا کر کیسا لگا؟ جس پر میکرون نے جواب دیتے ہوئے کہا بالکل اچھا نہیں لگا، کسی کو بھی ایسا نہیں کرنا چاہیے۔ فرانسیسی صدر ایمانوئیل میکرون نے بوائس ڈی پکارڈی قصبے کے ایک اسکول کا دورہ کیا۔یاد رہے 8 جون کو صدر ایمانوئل میکرون کو اس وقت ایک شہری نے چہرے پر تھپڑ رسید کیا جب وہ سرکاری دورے پر ڈروم پہنچے تھے، جس کی ویڈیو بہت وائرل ہوئی تھی ، جس میں دیکھا جاسکتا تھا کہ مذکورہ شخص نے ایک ہاتھ سے صدر کا ہاتھ مضبوطی سے تھامنے کے بعد انہیں اپنی طرف دکھیلا اور دوسرے ہاتھ سے طمانچہ دے مارا۔پولیس نے فرانسیسی صدر ایمانوئل میکرون کو تھپڑ مارنے والے شخص کو گرفتار کرلیا تھا اور بعد ازاں اسے قید کی سزا سنا دی گئی، زیرحراست ملزم کی شناخت 28 سالہ ڈیمن ٹیرل کے نام سے ہوئی ہے جو قوم پرست دائیں بازو کے نظریات سے متاثر تھا۔
