مظفرآباد (نیوزٹویو) آزاد جموں و کشمیرکے الیکشن میں کوٹلی کے حلقہ ایل اے 12 چڑھوئی میں پولنگ اسٹیشن پر فائرنگ سے دو افراد شخص جاں بحق ہوگئے ہیں۔ جاں بحق ہونے والے دونوں افراد کا تعلق کوٹلی سے ہے دریں ا ثنا الیکشن میں بد نظمی کے متعدد واقعات رپورٹ ہو ئے ہیں جن کی شکایات الیکشن کمیشن کے پاس جمع کرا دی گئی ہیں ان واقعات میں کئی افراد کو حراست میں لیا گیا ہے جبکہ کئی جگہ پولنگ بند کرا دی گئی ہے کوٹلی کے واقعہ کے حوالے سے پولیس کا کہنا ہےکہ تصادم دو سیاسی جماعتوں کے کارکنوں کے درمیان ہوا۔ پولیس صورتحال کنٹرول کرنے کی کوشش کر رہی ہے۔اطلاعات ہیں کہ کوٹلی میں پیپلزپارٹی کے امیدوار چودھری یاسین کی گاڑی پر بھی حملہ ہوا ہے۔ پیپلزپارٹی نے الزام لگایا ہے کہ چودھری یاسین کی گاڑی پر حملہ پی ٹی آئی کارکنوں نے کیافائرنگ سے گاڑی چھلنی ہوگئی تاہم چوہدری یسین بال بال بچ گئے۔ پیپلزپارٹی نے مطالبہ کیا ہے کہ االیکشن کمیشن اور انتظامیہ فوری کارروائی کرے۔انتخابی حلقے ایل اے چوالیس 44میں پولنگ اسٹیشن بیس 20 حیدرامین شہید ماڈل اسکول کے قریب واقع پاکستان پیپلزپارٹی کا پولنگ کیمپ اکھاڑ دیا گیا ہے۔اطلاعات کے مطابق پولیس کی مدد سے پی ٹی آئی کارکنان نے اکھاڑا جو کہ 400 میٹر کے فاصلے پر تھا۔ جبکہ پی ٹی آئی کا 200میٹر کے فاصلے پر واقع کیمپ برقرار رہا۔حلقہ ایل اے44 میں مبینہ طور پر پولیس ہدایات دے رہی ہے کہ کس کو ووٹ دینا اور کس کو نہیں دینا۔
پاکستان پیپلزپارٹی کے مرکزی الیکشن سیل کے سربراہ سینیٹر تاج حیدر نے آزاد جموں و کشمیر کے سیکریٹری الیکشن کمیشن کو واقعات کی تحریری شکایت جمع کرادی ہے۔حلقہ 45 کے پشاور سٹی نمبر2 اسکول میں بھی پولنگ روک دی گئی ہے۔ اطلاعات ہیں کہ پولنگ ایجنٹوں کی بد نظمی کے باعث روکی گئی۔پولیس نے ہنگامی آرائی کرنےوالے6 افرادکو حراست میں لیا ہے۔ پولیس کا کہنا ہے کہ حالات معمول پرآنے تک کسی کواندرجانےکی اجازت نہیں دےسکتے۔راولاکوٹ کے حلقے ایل اے 20 ریڑبن میں ووٹرز کےاحتجاج کے باعث پولنگ اسٹیشن کو تالے لگا دیئے گئے ہیں۔ اطلاعات ہیں کہ ووٹرز نے پولنگ عملے کو اسٹیشن کے اندر داخل نہیں ہونے دیامظاہرین کا کہنا ہے کہ ہمارے 150ووٹ دوسری جگہ منتقل کیے گئے ہیں احتجاج کی وجہ سے پولنگ بوتھ بند ہے اور ووٹنگ تاحال شروع نہیں ہو سکی۔
