اسلام آباد(نیوز ڈیسک) وزیر اعظم عمران خان نے کہا ہے کہ ملک بھر کے مزارات ہمارا تاریخی ورثہ ہیں۔ مذہبی سیاحت کے فروغ سے متعلق مقامات کی بحالی و تحفظ اہم ہے۔ وزیراعظم عمران خان کی زیر صدارت ویڈیو لنک کے ذریعے اجلاس ہوا۔ اجلاس میں وزیر اعلیٰ پنجاب عثمان بزدار، صوبائی وزیر اوقاف، صوبائی وزیر خزانہ، معاون خصوصی فردوس عاشق اعوان، چیف سیکرٹری پنجاب و دیگر نے شرکت کی۔ وزیر اعظم عمران خان نے کہا کہ ملک بھر کے مزارات ہمارا تاریخی ورثہ ہیں اور مذہبی سیاحت کے فروغ سے متعلق مقامات کی بحالی و تحفظ اہم ہے۔ انہوں نے کہا کہ سرکاری اراضی کو اسپتالوں اور تعلیمی اداروں کے لیے بروئے کار لایا جا سکے گا۔ اجلاس کے دوران وزیرِ اعظم کو لاہور کے تاریخی و مذہبی مقامات حضرت داتا گنج بخش علی ہجویری کے مزار اور بادشاہی مسجد کے تحفظ اور بحالی و آرائش کے حوالے سے منصوبے کے حوالے سے تفصیلی طور پر بریفنگ میںداتا دربار کے حوالے سے بتایا گیا کہ اس منصوبے میں دربار میں زائرین کی سہولیات، دربار کے اطراف میں افراسٹرکچر کی بہتری، اور زائرین کو بہتر سہولیات کی فراہمی کے ساتھ ساتھ اس مقام کو مذہبی سیاحت کا مرکز بنانے اور دینی تعلیم کا مرکز بنانے کے حوالے سے منصوبہ تشکیل دیا گیا ہے۔ اس منصوبے کے تحت دربار داتا گنج بخش کو ایک ویلفیئر مرکز کے طور پر ڈھالا جائے گا۔ جہاں مستحق زائرین کو کھانے، رہائش کی سہولیات کے ساتھ ساتھ انکی تعلیم کا انتظام بھی کیا جائے گا۔ اس کے ساتھ ساتھ دربار کے بہتر انتظام کو بھی یقینی بنایا جائے گا۔ تاکہ زائرین کو پارکنگ، لنگر اور دیگر سہولیات کو بہتر بنایا جا سکے۔ بادشاہی مسجد کے تحفظ و آرائش کے حوالے سے بتایا گیا کہ اس منصوبے میں تبرک گیلری، قرآن ہال، صحن کی بہتری اور نمازیوں کے لیے سہولیات کو بہتر بنایا جائے گا۔
