لاہور (نیوز ڈیسک) نواسۂ رسول حضرت حسین رضی اللّٰہ عنہ اور اُن کے جاں نثار ساتھیوں کی کربلا میں شہادت پر خراج عقیدت پیش کرنے کے لیے ملک کے چھوٹے بڑے شہروں میں مجالس اور جلوسوں کا سلسلہ جاری ہے۔ لاہور میں اندرون موچی گیٹ سے برآمد یوم عاشور کا مرکزی جلوس روایتی راستوں پر گامزن ہے جبکہ جہلم میں یوم عاشور کا مرکزی جلوس محلہ سخی شاہ بھور سے برآمد ہوا۔ ڈیرہ مراد جمالی میں یوم عاشورہ کا جلوس مرکزی امام باگاہ جعفر صادق سے برآمد ہوا جبکہ ڈی آئی خان میں اندرون و بیرون شہر امام بارگاہوں سے ماتمی جلوس برآمد ہوا اور اس موقع پر شہر میں موٹر سائیکل چلانے پر پابندی اور موبائل فون شام 6 بجے تک بند رہیں گے۔ خانیوال میں یوم عاشور کا مرکزی جلوس امام بارگاہ حسینیہ بلاک نمبر 11 سے برآمد ہوا جبکہ گھوٹکی میں مرکزی جلوس چوک ماڑی اوباڑو سے برآمد ہوا، جلوس ریتی روڈ اوباڑو پر اختتام پذیر ہوگا اور اس موقع پر ضلع بھر میں موبائل سروس بند معطل ہے۔ سکھر میں یوم عاشور پر سیکیورٹی کے تحت شہر اور گردونواح میں موبائل فون سروس معطل ہے جبکہ گوجرانوالہ شہر میں بھی موبائل فون سروس رات 10 بجے تک کے لیے معطل ہے۔ میانوالی میں بھی یوم عاشور پر سیکیورٹی انتظامات سخت ہیں جبکہ شہر میں موبائل فون سروس بھی معطل ہے۔ کوئٹہ میں علم ،تعزیہ اور ذو الجناح کا مرکزی جلوس چوک شہداء سے برآمد ہوا، عاشورہ محرم کا مرکزی جلوس علمدار روڈ پر رحمت اللّٰہ چوک سے برآمد ہوا۔ کوئٹہ میں عاشورہ کے جلوس کی سیکیورٹی کے لیے سخت انتظامات کیے گئے ہیں جبکہ موبائل فون سروس معطل ہے، جلوس کے روٹ کو جانے والے تمام راستے سیل، روٹ پر دکانیں اور کاروباری مراکز بھی بند ہیں۔ غذر میں ضلع بھر میں موبائل فون سروس معطل ہے جبکہ تمام داخلی و خارجی راستوں پر سیکیورٹی کے سخت انتظامات کیے گئے ہیں۔ اوکاڑہ کے علاقے شیر گڑھ میں یوم عاشور کا مرکزی جلوس شبیہ ذوالجناح، علم و تعزیہ بر آمد ہوا جبکہ بنوں میں عاشورہ کا مرکزی جلوس امام بارگاہ حسینیہ سے برآمد ہوا۔ میرپور آزاد کشمیر میں یوم عاشور کا مرکزی جلوس امام بارگاہ بیت الخزن سے برآمد ہوا، اس کے علاوہ یوم عاشور کا مرکزی جلوس مرکزی امام بارگاہ حیدری چوک سے بھی برآمد ہوا۔
