اسلام آباد(نیوزٹویو) ترجمان فیڈرل بورڈ آف ریونیو نے کچھ اخبارات میں انکم ٹیکس گوشوارے داخل کروانے کی تاریخ میں توسیع کے حوالے سے شائع کردہ خبروں کی پرزور تردیدکی ہے اور وضاحت میں کہا ہے کہ ایف بی آر ہیڈ کوارٹر میں اس ضمن میں کوئی تجویززیر غور نہیں ۔ترجمان ایف بی آر نے مزید بتایا کہ ملکی سطع پر گوشوارے جمع کروانے کے حوالے سے اک مربوط اشتہاری مہم کا آغاز کر دیا گیا ہے جو 30 ستمبر تک جاری رہے گی۔الیکٹرونک ،پرنٹ اور سوشل میڈیا پر بھرپور آگاہی مہم جاری ہے جس کے بہت حوصلہ افزاء نتائج سامنے آرہے ہیں اور لوگ بڑھ چڑھ کر اپنے سالانہ انکم ٹیکس گوشوارے جمع کروارہے ہیں ۔انہوں نے ٹیکس گزاروں سے اپیل کی ہے کہ وہ حتمی تاریخ 30 ستمبر 2021 سے قبل اپنے سالانہ انکم ٹیکس گوشوارےداخل کر وائیں اور بے بنیاد اور گمراہ کن خبروں پر کان نہ دھریں ۔ کسی بھی قسم کی راہنمائی کے لئے ایف بی آر کی ہیلپ لائن 111772772 پر کال کریں، یا اپنے قریبی انکم ٹیکس دفتر سے رابطہ کریں۔
