اسلام آباد(نیوزٹویو) فیڈرل بورڈ آف ریونیو نے ایک مرتبہ دوبارہ اس امر کی وضاحت کی ہے کہ ٹیکس سال 2021 کے لئے انکم ٹیکس گوشوارے داخل کرنے کی تاریخ میں توسیع نہیں کی جارہی اور افراد، ایسوسی ایشن آف پرسنز اور کمپنیز کے لئے انکم ٹیکس گوشوارے داخل کرنے کی حتمی تاریخ 30 ستمبر 2021 ہے۔ایف بی آرنے جاری کردہ اعلامیہ میں کہا کہ آئرس سسٹم روانی سے چل رہا ہے جس کا ثبوت یہ ہے کہ 28 ستمبر کو تقریبا”1 لاکھ 50 ہزار گوشوارے داخل کئے گئے جو کہ کسی ایک دن میں داخل کئے جانے والے گوشواروں کی تعداد میں سب سے زیادہ ہیں۔ دریں اثناء گزشتہ سال کی طرح ایف بی آر نے اپنے سسٹم کی استعداد کار میں اضافہ کیا ہے تاکہ ٹیکس گزاران کو بہترین سہولیات فراہم کی جا سکیں۔ایف بی آر نے ٹیکس گزاروں سے اپیل کی ہے کہ وہ قانونی پیچیدگیوں سے بچنے کے لئے آخری تاریخ ختم ہونے سے قبل اپنے انکم ٹیکس گوشوارے داخل کر لیں۔
