مسلم لیگ ن کی لیڈرشپ میں لڑائیاں ہیں،جھگڑے ورکرزکے نہیں قیادت کے ہیں،خواجہ آصف کااعتراف

راولپنڈی(نیوزٹویو) پاکستان مسلم لیگ (ن) کے مرکزی رہنما خواجہ محمد آصف نے تسلیم کیا ہے کہ مسلم لیگ ن کی لیڈر شپ میں لڑائیاں ہیں اسے ختم کریں جھگڑے ورکرز کے نہیں قیادت کے ہیں جھگڑے ختم نہ کیے تو کبھی بھی کامیاب نہیں ہو سکیں گے۔ن لیگ میں دراڑیں ختم ہونی چاہئیں اور اتحاد ہونا چاہئیے انہوں نے دعویٰ کیا ہے کہ پی ٹی آئی کی حکومت کا خاتمہ اورعام انتخابات کسی بھی وقت ہو سکتے ہیں۔ ن لیگ کے زیراہتمام منعقدہ ورکرز کنونشن سے خطاب کرتے ہوئے سابق وزیر دفاع خواجہ محمد آصف نے کہا کہ حکومت کا بوریا بسترکسی بھی وقت گول ہو سکتا ہے آئندہ عام انتخابات میں کامیابی کے لیے اتحاد قائم کرنا ہو گا۔ انہوں نے کہا کہ ن لیگ  نے ہمیشہ عوام کی خدمت کی ہے اور کنٹونمنٹ انتخابات میں ن لیگ کی کامیابی عوامی خدمت کا ثمر ہےانہوں نے کہا کہ مہنگائی اور غربت سے عوام تنگ آچکے ہیں۔ انہوں ںے زور دے کرکہا کہ  ہمیں اپنی صفوں میں اتحاد قائم کرنا ہے۔ کراچی سے لے کر خیبر تک ن لیگ سیسہ پلائی ہوئی دیوار ہے۔انہوں نے کہا کہ آزاد کشمیر و گلگت بلتستان کے انتخابات شفاف نہیں تھے۔ ان کا کہنا تھا کہ ملک میں کسی بھی وقت عام انتخابات کا انعقاد ہو سکتا ہے۔کنٹونمنٹ انتخابات میں 73 فیصد ووٹ موجودہ حکمرانوں کے خلاف پڑا ہے۔ انہوں نے حکومت کو کڑی نکتہ چینی کا نشانہ بناتے ہوئے کہا کہ نا اہل حکومت عوام کا خون چوس کر ہنس رہی ہے جب کہ عوام مہنگائی و غربت سے تنگ آچکے ہیں انہوں نے کہا کہ عوام نے اپنے ووٹ کی عزت پامال نہیں ہونے دی اسی لئے کینٹ بورڈ الیکشن میں کامیابی ملی ملک کے طول وعرض میں نواز شریف کی محبت کا سمندر رواں دواں ہے پانچ سال عوام کی خدمت کی۔