اسلام آباد(نیوزٹویو) چیئرمین سی ڈی اے (کیپٹن) ریٹائرڈ نور الامین مینگل نے تمام بڑے پارکس میں سپورٹس اکیڈمیاں قائم کرنے اور موسم بہار کے موقع پر شہر بھر میں مختلف مقامات پر پانچ لاکھ مختلف اقسام کے پھلدار اور پھولدار درخت لگانے کی ہدایات جاری کر دی ہیں شجرکاری کی مانیٹرنگ جیو ٹیکنگ کے ذریعے یقینی بنائی جائے گی وفاقی ترقیاتی ادارے (کپیٹل ڈیولپمنٹ اتھارٹی) کے چیئرمین (کیپٹن) ریٹائرڈ نور الامین مینگل کی زیر صدارت منگل کے روز ماحولیات (انوائرمنٹ) کے حوالے سے ایک اہم اجلاس سی ڈی اے ہیڈ کوارٹرز میں منعقد ہوا۔ جس میں ممبر انوائرمنٹ، ڈی ڈی جی انوائرمنٹ سمیت دیگر افسران نے شرکت کی۔ اجلاس میں بریفننگ دیتے ہوئے چیئرمین کپیٹل ڈیولپمنٹ اتھارٹی کیپٹن (ریٹائرڈ) نور الامین مینگل کو انوائرمنٹ ونگ کے بارے میں تفصیلات سے آگاہ کیا گیا۔ اس موقع پر چیئرمین سی ڈی اے نے ہدایت جاری کرتے ہوئے کہا کہ رواں برس موسم بہار کے موقع پر شہر بھر میں مختلف مقامات پر پانچ لاکھ مختلف اقسام کے پھلدار اور پھولدار درخت لگائے جائیں جو مقامی ماحول سے مطابقت رکھتے ہوں۔
چیئرمین کپیٹل ڈیولپمنٹ اتھارٹی کیپٹن (ریٹائرڈ) نور الامین مینگل نے اجلاس میں ہدایات جاری کرتے ہوئے مزید کہا کہ رواں برس موسم بہار میں ہونے والی شجرکاری مہم میں سول سوسائٹی اور رضاکاروں کو خاص طور پر شامل کیا جائے تاکہ زیادہ سے زیادہ شجرکاری کو یقینی بنایا جاسکے۔ اسی طرح کی جانے والی شجرکاری کو جیو ٹیکنگ کے ذریعے مانیٹرنگ کو بھی یقینی بنایا جائے تاکہ ہونے والی شجرکاری کی حفاظت کو ڈیجیٹلائزیشن نگرانی بھی کی جاسکے
مزید برآں چیئرمین کپیٹل ڈیولپمنٹ اتھارٹی نے اجلاس میں سیکٹرآئی الیون میں پارکس بنانے کی حتمی منظوری بھی دی اور ہدایت جاری کرتے ہوئے شعبہ ایچ آر کو کہا کہ مارگلہ فاریسٹ ایریا میں فاریسٹ گارڈز کی خالی آسامیاں فوری طور پر پر کی جائیں۔ انہوں نے مزید کہا کہ مارگلہ فاریسٹ ایریا میں مزید شجرکاری بھی کی جائے۔ چیئرمین کپیٹل ڈیولپمنٹ اتھارٹی نے مزید کہا کہ اسلام آباد کے تمام پارکس میں بچوں کے لئے صحت مندانہ سرگرمیاں بھی فراہم کی جائیں اور تمام بڑے پارکس میں سپورٹس اکیڈمیاں بھی قائم کی جائیں۔ اسی طرح تمام پارکس میں عوام الناس کی رہنمائی کے لئے لکڑی اور پتھر سے بنے (آرگینک) سائن بورڈز نمایاں جگہوں پر آویزاں کئے جائیں تاکہ پارکس میں آنے والے شہریوں کو کسی بھی قسم کی مشکلات کا سامنا نہ کرنا پڑے۔ اورایف نائن پارک میں برڈز ہوم بھی بنایا جائے۔ اسی طرح مستقبل میں شجرکاری کی اہمیت کو مدنظر رکھتے ہوئے شہر میں مختلف مقامات پر 4 مزید نئی نرسریاں بھی قائم کی جائیں
