اسلام آباد(نیوزٹویو) وفاقی کابینہ نےازخودںوٹس کے حوالے سےعدالتی اصلاحات کےترمیمی مسودے کی منظوری دے دی ہے منگل کو وزیر اعظم کے زیر صدارت وفاقی کابینہ کا اجلاس ہواجس میں کابینہ نے عدالتی اصلاحات کے قانون کے مسودہ کی منظوری دی۔ بل میں از خود نوٹس کے فیصلے پر 30 دن کے اندر اپیل دائر کرنے کا حق دینے کی تجویز دی گئی ہے، اپیل دائر ہونے کے 14 روز کے اندر سماعت کیلئے مقرر کرنا ہوگی۔ ازخود نوٹس کا فیصلہ سپریم کورٹ کے تین سینئر ترین ججز کرینگے قبل ازیں وزیراعظم کی زیر صدارت وفاقی کابینہ اجلاس میں وزیر قانون اعظم نذیر تارڑ نے مجوزہ قانون سازی پر بریفنگ دی، وزیر قانون نے اعلیٰ عدلیہ کے بے پناہ اختیارات کو محدود کرنے کی تجویز دی۔
ذرائع کے مطابق وفاقی کابینہ کے ارکان نے قومی اسمبلی اجلاس میں وزیراعظم کے خطاب پر خراج تحسین پیش کیا، کابینہ ارکان نے کہا کہ وزیر اعظم نے عوامی امنگوں کی درست ترجمانی کی، اس موقع پر وفاقی کابینہ ارکان نے پارلیمنٹ کی مضبوطی اور بالادستی کے عزم کا اعادہ کیا۔
