اسلام آباد(نیوزٹویو) دفترخارجہ کی ترجمان ممتاز زہرہ بلوچ نے کہا ہے کہ پاکستان عبوری افغان حکومت کی جانب سے اپنی سرزمین کے اندر کسی بھی تعمیر کو قبول نہیں کرسکتا یہ ملک کی خودمختاری کی خلاف ورزی ہے طورخم بارڈر کی بندش سے متعلق افغان حکومت کے بیان کا جواب دیتے ہوئے دفتر خارجہ نے کہا ہے کہ اسلام آباد کو توقع ہے کہ کابل اپنی علاقائی سالمیت کا احترام کرے گا اور اس بات کو یقینی بنائے گا کہ پاکستان میں عسکریت پسندوں کے حملوں کے لیے افغان سرزمین استعمال نہ ہو۔
سوموارکودفترخارجہ سے جاری کیے گئے بیان میں ترجمان ممتاز زہرہ بلوچ نے کہا کہ افغان وزارت خارجہ کا بیان حیران کن تھا کیونکہ عبوری افغان حکام سرحد کی عارضی بندش کی وجوہات کو بخوبی جانتے ہیں۔ پاکستان، عبوری افغان حکومت کی جانب سے اپنی سرزمین کے اندر کسی بھی تعمیر کو قبول نہیں کرسکتا کیونکہ یہ ملک کی خودمختاری کی خلاف ورزی ہے۔انہوں نے کہا کہ 6 ستمبر کو جب افغان سیکیورٹی فورسز کو اس طرح کی غیر قانونی چوکیاں بنانے سے روکا گیا تو افغان فوجیوں نے اندھا دھند فائرنگ کرکے پاکستانی فوجی چوکیوں کو نشانہ بنایا، طورخم بارڈر ٹرمینل پر بنیادی ڈھانچے کو نقصان پہنچایا اور پاکستانی اور افغان شہریوں کی زندگیوں کو خطرے میں ڈال دیا۔
ممتاز زہرہ بلوچ نے کہا کہ پاکستانی سرحدی چوکیوں پر اس طرح کی بلااشتعال اور اندھا دھند فائرنگ کو کسی بھی صورت میں جائز قرار نہیں دیا جا سکتا، افغان فورسز کی اس طرح کی بلااشتعال فائرنگ سے دہشت گرد عناصر کو حوصلہ ملتا ہے۔ دہشت گرد عناصر افغانستان کے اندر پناہ گاہوں سے لطف اندوز ہو رہے ہیں جیسا کہ اقوام متحدہ کی سلامتی کونسل کی تجزیاتی معاونت اور پابندیوں کی نگرانی کرنے والی ٹیم نے اپنی تازہ ترین رپورٹ میں بھی اس کی تصدیق کی ہے۔
ترجمان دفتر خارجہ نے کہا کہ پاکستان نے ہمیشہ کہا ہے کہ وہ افغانستان کے ساتھ سرحد پر دونوں ممالک کے درمیان امن اور دوستی کی خواہش رکھتا ہے۔ہم نے کئی دہائیوں سے اپنے افغان بھائیوں اور بہنوں کا کھلے دل سے استقبال کیا ہے، پاکستان نے پاکستان، افغانستان سرحد پر تعینات افغان فوجیوں کی جانب سے مسلسل بلاجواز اشتعال انگیز فائرنگ کے پیش نظر تحمل کا مظاہرہ کیا ہے اور بات چیت کو ترجیح دی ہے۔بارڈر کی عارضی طور پر بندش صرف سنگین صورتوں میں ہوتی ہے۔
انہوں نےکہا کہ افغان وزارت خارجہ کے جاری کردہ بیان میں پاکستان کی معیشت اور غیر ملکی تجارت کے بارے میں غیر متعلقہ تبصرے اور غیر منقولہ مشورے شامل تھے۔ پچھلی کئی دہائیوں سے، پاکستان نے افغان ٹرانزٹ ٹریڈ میں سہولت فراہم کی ہے اور کرتا رہے گا۔ تاہم پاکستان ٹرانزٹ ٹریڈ معاہدے کے غلط استعمال کی اجازت نہیں دے سکتا۔پاکستان تمام دوطرفہ مسائل اور خدشات کو تعمیری بات چیت کے ذریعے حل کرنے کے لیے تیار ہے۔
دفتر خارجہ کے ترجمان نے کہا کہ ہم افغان حکام سے توقع کرتے ہیں کہ وہ پاکستان کے تحفظات کو ذہن میں رکھیں گے، پاکستان کی علاقائی سالمیت کا احترام کریں گے اور اس بات کو یقینی بنائیں گے کہ افغان سرزمین پاکستان کے خلاف دہشت گرد حملوں کے لیے لانچنگ پیڈ کے طور پر استعمال نہ ہو
یادرہے کہ طورخم بارڈر 6 ستمبر کو پاکستان اور افغان سرحدی افواج کے درمیان فائرنگ کے تبادلے میں فرنٹیئر کور (ایف سی) کے ایک اہلکار سمیت کم از کم دو افراد کے زخمی ہونے کے بعد بند کر دیا گیا تھا۔ پاکستانی حکام نے دوپہر کی فائر فائٹ شروع کرنے پر افغان فورسز کو مورد الزام ٹھہرایا، جو کہ تقریباً دو گھنٹے تک جاری رہی اور افغان حکام کی جانب سے مرکزی سرحدی گزر گاہ کے قریب ایک ممنوعہ علاقے میں ایک چوکی بنانا شروع کر دی گئی۔ حکام نے بتایا کہ افغان حکام کے پاس پہلے سے ہی ایک چوکی تھی، لیکن انہوں نے پاکستانی فریق سے بات کیے بغیر ایک پہاڑی پر ایک اور چوکی بنانا شروع کر دی جبکہ ایک روز قبل پاکستان اور افغان بارڈر سیکیورٹی حکام کے درمیان سرحد کو دوبارہ کھولنے کے حوالے سے معاہدہ کرنے کے لیے ہونے والی ملاقات بے نتیجہ رہی۔
واضح رہے کہ افغان وزارت خارجہ کی جانب سے جاری کردہ ایک بیان میں طورخم گیٹ کی بندش پر تشویش کا اظہار کیا گیا اور اسے اچھے پڑوسی کی اقدار کے منافی قرار دیا گیا تھا۔ بیان میں فائرنگ شروع کرنے کا الزام پاکستان پر عائد کیا گیا اور کہا گیا کہ افغان فورسز کئی سال قبل تعمیر کی گئی پرانی سیکیورٹی چیک پوسٹ پر صرف مرمت کا کام کر رہی تھیں۔
