کراچی (نیوزٹویو)برطانیہ نے پاکستان کے ائرپورٹس کے لیے جدید ترین سکیورٹی سکینر فراہم کردئیے ہیں جدید مشین کی تنصیب سے برطانیہ جانے والی پروازوں کی اضافی سکیورٹی کی ضرورت نہیں پڑے گی، جدید مشین کے ذریعے سامان کی سرچنگ کا عمل برق رفتار سے ہو گا۔ برطانوی ہائی کمشنر جین میریٹ نے سکینرز حوالے کرنے کی تقریب میں شرکت کی تقریب سے خطاب کرتے ہوئے برطانوی ہائی کمشنر نے کہا کہ برطانیہ میں تقریباً 16 لاکھ پاکستانی بستے ہیں، یہ پاکستانی برطانوی معاشرے کا اہم حصہ ہیں، پاکستان کے ساتھ ہمارا خاص تعلق ہے، ہر سال لاکھوں افراد پاکستان اور برطانیہ کا سفر کرتے ہیں۔ان افراد کی نقل و حرکت دونوں ممالک کے عوام میں مضبوط تعلق کی عکاس ہے، دونوں ممالک میں تجارت بڑھانے کے لیے فضائی روابط بڑی اہمیت رکھتے ہیں۔
جین میریٹ نے کہا کہ برطانیہ نے کراچی اور لاہور کے ایئرپورٹس کے لیے 6 کروڑ مالیت کے جدید سکینرز فراہم کیے ہیں، اس اقدام سے مسافروں کے سامان کی مناسب سکیننگ ہو سکے گی۔
برطانوی ہائی کمشنر نے کہا کہ کراچی ایئرپورٹ پر سکیورٹی سکینرز حوالے کرنے پر خوشی محسوس ہوئی۔
کراچی ایئرپورٹ پر جدید بیگیج سرچ مشین کی افتتاحی تقریب میں ڈی جی سی اے اے خاقان مرتضیٰ، کراچی ایئرپورٹ انتظامیہ، اے ایس ایف کےاعلیٰ حکام نے شرکت کی سی اے اے حکام کے مطابق سٹیٹ آف دی آرٹ مشین برطانیہ کی جانب سے سی اے اے کےحوالے کی گئی ہے، کراچی کے بعد لاہور ایئرپورٹ پر بھی اسی ٹیکنالوجی کی مشین نصب کی جائے گی، لاہور اور کراچی سے پی آئی اے پروازوں کا معاملہ جلد حل ہو جائے گا۔
