اسلام آباد(نیوزٹویو)بھارت نے دریائے راوی کے بعد دریائے ستلج میں بھی پانی چھوڑ دیا ہے جس کے حوالے سے پی ڈی ایم اے نے ہائی الرٹ جاری کر دیا ہے۔
پی ڈی ایم اے کے مطابق بھارت نے ہریکے کے مقام سے 95 ہزار 27 کیوسک پانی دریائے ستلج میں چھوڑا ہے۔
ڈی جی پی ڈی ایم اے عمران قریشی کی جانب سے ہدایت کی گئی ہے کہ اس ضمن میں قصور، اوکاڑہ، پاکپتن، بہاولنگر اور وہاڑی کے ڈپٹی کمشنرز پیشگی انتظامات مکمل کریں۔
ان کا کہنا ہے کہ ایمرجنسی کنٹرول روم میں اسٹاف کو ہمہ وقت الرٹ رکھا جائے، تمام متعلقہ محکمے تازہ ترین صورتِ حال سے اتھارٹیز کو آگاہ رکھیں۔
ڈی جی پی ڈی ایم اے عمران قریشی نے ہدایت کی ہے کہ ریسکیو 1122 کی ڈیزاسٹر رسپانس ٹیم کو ہائی الرٹ رکھا جائے، ریسکیو آپریشن کے لیے پیٹرول اور ڈیزل کا اسٹاک وافر مقدار میں ہونا چاہیے۔
انہوں نے مزید کہا ہے کہ نشیبی علاقوں میں شہریوں کو ممکنہ سیلابی صورتِ حال سے آگاہ کیا جائے، میڈیکل کیمپس میں ادویات کی دستیابی کو وافر مقدار میں یقینی بنایا جائے۔
ڈی جی پی ڈی ایم اے عمران قریشی کا یہ بھی کہنا ہے کہ جانوروں کے لیے مناسب جگہ اور خوراک کا بندوبست بھی کیا جائے۔
