لا ہور(نیوزٹویو) پا کستان شوگرملز ایسوسی ایشن نے حکومت سے گنا سرکاری ریٹس پرفراہمی کو یقینی بنانےکا مطالبہ کیا ہے اوروضاحت کی ہےکہ چینی کی قیمت صوبا ئی حکومتیں مقرر نہیں کریں گی یہ طلب اور رسد کی بنیاد پر طے کی جا ئیں گی صوبائی حکومتوں اور پا کستان شوگرملزایسوسی ایشن میں معامالت طے پا چکے ہیں پاکستان شوگر ملز ایسوسی ایشن کے ترجمان کے مطابق پسما کے وفد نے چیف سیکرٹری پنجاب کے ساتھ ملاقات کی جو انتہا ئی مثبت رہی ملاقات میں دونوں طرف سے بہتر ہم آہنگی کا عندیہ دیا گیا۔ انڈسٹری اور حکومت مل کر چلیں گے۔ انڈسٹری کے مسائل حکومت دیکھے گی اور ایسا کوئی عمل نہیں ہوگا جس سے صارفین کیلئے مشکلات پیدا ہوں۔اس ملاقات میں شوگرملز ایسویشن نے چیف سیکرٹری کو وضاحت کے ساتھ بتایا کہ موجودہ سال بھی شوگر ملوں کو مہنگا گنا مل رہا ہے۔ اور حکومت کی مقرر کردہ قیمت جو کہ 225 روپے ہے اس کے برعکس شوگرملوں کو گنا 260-280 روپے فی چالیس کلوگرام مل رہا ہے۔ جہاں مڈل مین متحرک ہوگئے ہیں وہاں قیمت 300 روپے سے بھی تجاوز کرگئی ہے۔ گنے کی موجودہ قیمت سے چینی کی پیداواری لاگت اوسطاَ 95 روپے فی کلوگرام بنتی ہے۔
اس میٹنگ کے حوالے سے میڈیا نے یہ خبر دی ہے کہ چینی کی قیمت ایکس مل 90 روپے سے زیادہ نہیں ہونی چاہیے۔ پسما کے ترجمان نے اس بات کی وضاحت کی کہ ہماری مرکزی اور صوبائی حکومتوں میں جتنی میٹنگز ہوئی ہیں اس میں دونوں طرف سے یہ طے پایا تھا کہ حکومت چینی کی قیمت مقرر نہیں کرے گی بلکہ اسے طلب ورسد کے بنیادی اصول پر چھوڑا جائے گا۔ لیکن اگر گنا مہنگا ہوگا تو چینی کی پیداواری لاگت اسی تناسب سے بڑھے گی سرکاری ادارے ان تمام حقائق، پیداواری اخراجات اور دوسرے عوامل کو سامنے رکھ کر چینی کے بارے میں حقائق پر بات کریں۔ اگر حقائق سے ہٹ کر فیصلے کیے گئے تو اس کے منفی نتائج برآمد ہو سکتے ہیں۔ترجمان نے یہ بھی وضاحت کی کہ گنے، شوگرملز اور دیگر معلومات جو کہ کین کمشنر کو قانونی طور پر دینی چاہیے وہ گزشتہ سال کی طرح کین کمشنر کو روزانہ کی بنیاد پر دی جا رہی ہیں۔
