اسلام آباد(نیوزٹویو) پاکستان مسلم لیگ ن کےصدراورقومی اسمبلی میں قائد حزب اختلاف محمد شہباز شریف نے وزیراعظم کے خط کو جھوٹ اور فراڈ قراردیتے ہوئے کہا ہے کہ اس طرح کے میمو تو دن رات آتے رہتے ہیں قوم کے سامنے ثبوت لائے جائیں۔ ڈپٹی سپیکر نے ایوان میں پارلیمانی روایات کی دھجیاں اڑائیں۔وزیراعظم عمران خان کیخلاف عدم اعتماد کی تحریک آگے لیکر جائیں گے۔ آئین اور قانون کا راستہ اختیار کیا جائیگا پارلیمان کے اندر حق لیا جائیگا۔ قومی اسمبلی کے اجلاس کے بعد پاکستان پیپلز پارٹی کے چیئر مین بلاول بھٹو زرداری سمیت اپوزیشن رہنماؤں کے ہمراہ میڈیا سے گفتگو کرتے ہو ئےشہبازشریف نے کہا کہ ڈپٹی سپیکر نے آج پھر ایوان میں پارلیمانی روایات کی دھجیاں اڑائیں، آج ایوان میں تحریک عدم اعتماد پر بحث ہونا تھی، اپوزیشن نے آج ووٹنگ کے لیے سپیکر کو درخواست بھی دی تھی، سوالات کرنے والے تمام ارکان نے ووٹنگ کامطالبہ کیا۔
انہوں نے کہا کہ ڈپٹی سپیکر نے جب دیکھا کہ کوئی ممبر سوال کرنے پر تیار نہیں تو وہ بھاگ گئے، میں اور بلاول سپیکر ڈائس پر بھی گئے، آج بھی قانون کی پاسداری نہیں کی گئی، ہم نے فیصلہ کیا تھا آج کوئی غیر پارلیمانی بات نہیں کریں گے، عدلیہ بھی دیکھ رہی ہے، پورا ملک پریشان ہے، متحدہ اپوزیشن کے آج 172ارکان ایوان میں موجود تھے۔شہباز شریف نے کہا کہ عدم اعتماد کی تحریک آگے لیکر جائیں گے۔ عدم اعتماد کو کامیاب کرنے کیلئے جو نمبر درکار ہے وہ آج ہمارے پاس تھے۔ سلیکٹڈ وزیراعظم کے پاس اس کے بعد کیا جواز رہ جاتا ہے، سابق وزیراعظم نوازشریف پر جھوٹے الزامات لگائے جارہے ہیں، عمران نیازی اس گھٹیا لیول پرنہیں جانا چاہتے جہاں تم جا چکے، تمہیں فارن فنڈنگ کرنے والے بھارتی،اسرائیلی بھی ہے۔
انہوں نے کہا کہ الزام لگانا بہت آسان اور ثابت کرنا بہت مشکل ہے، آپ نے فنڈز لیے اور سٹیٹ بینک سمیت باقی اداروں سے بھی چھپایا، پوری قوم کے سامنے آج متحدہ اپوزیشن کامیاب ہوچکی ہے۔ بدبانی تمہارا تکیہ کلام ہے، ایک خاتون نے اربوں کی کرپشن کرکے پیسے دبئی بھجوائے، عمران نیازی کو اپنے گریبان میں جھانکنا چاہیے، باتیں امر بالمعروف اور ریاست مدینہ کی کرتے ہو، گیس، چینی،گندم میں اربوں روپے کے گھپلے کیے گئے۔انہوں نے کہاکہ قرآن کریم میں ہے شیطان کے وسوسوں سے بچنا چاہیے، آج قوم کے سامنے متحدہ اپوزیشن کامیاب ہوچکی ہم جیت چکے ہیں، کہا تھا خط کو پارلیمان میں لائیں، مریم اورنگزیب نے مجھے آج حکومت کی طرف سے دعوت کے بارے میں پانچ بجے پیغام دیاہم نے کہا تھا جو بھی خط ہے، آئیں اور پارلیمنٹ میں خط دکھائیں مگرآج بھی خط نہیں لایا گیا، یہ خط اس شخص کے یوٹرن کی طرح جھوٹا اور فراڈ ہے
