اسلام آباد(نیوزویو)پاکستان رینجرز نے بھارت کی طرف سے اسمگلنگ کی بڑی کارروائی ناکام بنادی۔
انٹر سروسز پبلک ریلیشنز (آئی ایس پی آر) کے مطابق 29 جولائی تا 3 اگست دراندازی کی کوششوں میں 6 بھارتی اسمگلروں کو گرفتار کرلیا گیا ہے۔
اس حوالے سے آئی ایس پی آر کا بتانا ہے کہ گرفتار بھارتی شہری منشیات اور ہتھیاروں کی اسمگلنگ میں ملوث ہیں، گرفتار بھارتی شہریوں میں فیروزپور کے رہائشی گرمیج سنگھ، شندر سنگھ، جگندر سنگھ، وشال سنگھ شامل ہیں۔
آئی ایس پی آر کے مطابق جالندھر کا رہائشی مہندر سنگھ اور لدھیانہ سے تعلق رکھنے والا گروندر سنگھ بھی گرفتار افراد میں شامل ہے۔
اس حوالے سے آئی ایس پی آر کا کہنا ہے کہ گرفتار اسمگلروں کے خلاف پاکستان میں غیر قانونی داخلے اور پاکستان میں ریاست مخالف سرگرمیوں پر کارروائی ہوگی، بھارتی اسمگلروں کی بی ایس ایف کے زیرِ نگرانی بارڈر سے بلا روک ٹوک نقل و حرکت حیران کُن ہے۔
آئی ایس پی آر کے مطابق بھارتی بی ایس ایف کا اسمگلروں کے ساتھ ممکنہ گٹھ جوڑ بعیداز قیاس نہیں، توقع ہے کہ بی ایس ایف بارڈر پر نگرانی کا نظام مؤثر اور اسمگلروں کے ساتھ گٹھ جوڑ ختم کرے گی۔
