لاہور(نیوزٹویو) پنجاب حکومت نے شدید بارشوں کے باعث راوی اورستلج میں سیلابی صورتحال کے پیش نظر صوبے میں ریڈ الرٹ جاری کرنے کا فیصلہ کیا ہے پنجاب کےنگران وزیراطلاعات عامر میر کا کہنا ہے کہ بھارت میں مزید بارشیں ہوئیں توراوی اور ستلج میں بڑا سیلاب آسکتا ہے اتوار کوکابینہ اجلاس کے بعد پریس کانفرنس سے خظاب کرتے ہوئے وزیر اطلاعات عامر میر نے کہا کہ کابینہ میں سیلاب سے پیدا ہونے والی صورتحال کا جائزہ لیا گیا، دریائے راوی 90 فیصد اور دریائے ستلج پر واقع بھیم ڈیم 70 فیصد بھر چکا ہے، دونوں دریاؤں میں سیلاب کا خدشہ ہے، اجلاس میں سیلابی صورتحال کے باعث ریڈ الرٹ جاری کرنے کا فیصلہ کیا گیا ہے۔
انہوں نےکہا کہ دریائے راوی میں 22 ہزار کیوسک کا ریلا شاہدرہ کے مقام سے گزر رہا ہے، دہلی اس وقت پورا ڈوبا ہوا ہے، بھارت میں مزید بارشیں ہوئیں تو 1988کی طرح شاہدرہ بھی ڈوب سکتا ہے، بارشوں سے راوی اور ستلج دریا میں سیلاب آ سکتا ہے، لوگوں نے دریا کے کناروں پر غیر قانونی بستیاں آباد کر رکھی ہیں، 99 فیصد آبادیاں دریا کے اندر بنائی گئی ہیں۔
انہوں نے کہا کہ سیلاب ممکنہ طور پر بڑھتا ہے تو ہم آبادیوں کو فوری طور پر خالی کریں گے، جب علاقے خالی کرنے کا کہا جائے تو عوام حکومت کے ساتھ تعاون کریں، ہر علاقے میں سیلاب کی صورتحال کے پیش نظر انخلا کا پلان تیار کر لیا ہے، متعلقہ محکمے ایک ایک آبادی کو مانیٹر کر رہے ہیں۔
