کورونا میں مبتلا ہونے کا خطرہ ٹلا نہیں احتیاطی تدابیر اپنائیں، ڈبلیو ایچ او

اسلام آباد(نیوز ویب) ڈبلیو ایچ او کا کہنا ہے کہ ویکسینیشن کرانے کے باوجود کورونا میں مبتلا ہونے کا خطرہ ٹلا نہیں ہے۔عالمی ادارۂ صحت کے سربراہ ٹیڈ روس ایڈہینم نے میڈیا کو بریفنگ میں کہا ہے کہ ویکسین شدہ افراد بھی ماسک پہنیں۔ سماجی فاصلہ اختیار کریں اور ہجوم سے بچیں۔ احتیاطی تدابیر ضروری ہیں۔انہوں نے کہا کہ دنیا بھر کے ممالک کا مستقبل میں کورونا وائرس کی وباء کی نئی لہر سے بچنے کے لیے اقدامات یقینی بنانا اہم ہے۔ انہوں نے مزید کہا کہ ویکسینز جان بچاتی ہیں۔ مگر کورونا وائرس کو منتقلی سے مکمل طور پر نہیں روکتیں ہے۔ ویکسین شدہ افراد میں کورونا سے شدید بیمار ہونے یا مرنے کا خطرہ بہت کم ہو جاتا ہے۔ لیکن کورونا وائرس سے متاثر ہونے اور دوسروں کو متاثر کرنے کا خطرہ برقرار رہتا ہے۔سربراہ ڈبلیو ایچ او نے کہا کہ بہت سے ممالک اور کمیونیٹیز میں غلط تصور ہے کہ ویکسین نے کورونا وائرس کی وباء کو ختم کر دیا ہے اور ویکسین شدہ افراد کو احتیاطی تدابیر کی ضرورت نہیں رہی۔ ٹیڈ روس نے یہ بھی کہا کہ گزشتہ ہفتے دنیا بھر میں رپورٹ ہوئے کورونا کیسز میں سے 60 فیصد یورپ میں پائے گئے ہیں۔ جب یورپ دوبارہ کورونا وائرس کی وباء کا مرکز بن گیا ہے تو کوئی ملک بھی اس خطرے سے خالی نہیں ہے۔