راولپنڈی(نیوزٹویو) پا کستان کی مسلح افواج کے سربراہ جنرل سید عاصم منیر نے بدھ کو ہیوی انڈسٹریل کمپلیکس ٹیکسلا کا دورہ کیا جہاں جدید ترین ٹیکنالوجی سے تیار کردہ ٹینک ’حیدر‘ کو باضابطہ طور پر رول آؤٹ کر دیا گیا۔پاک فوج کے شعبہ تعلقات عامہ (آئی ایس پی آر ) کی جانب سے جاری بیان کے مطابق ہیوی انڈسٹریز ٹیکسلا نے چین کے تعاون سے تیار کردہ ٹینک حیدر کو باضابطہ طور پر رول آؤٹ کر دیا ہے۔
آئی ایس پی آر کے مطابق حیدر ٹینک کی رول آؤٹ تقریب کے مہمان خصوصی آرمی چیف جنرل سید عاصم منیر تھے، تقریب میں چین کے سفیر، چینی کمپنی کے حکام، عسکری و سول حکام بھی شریک ہوئے۔
ترجمان پاک فوج کے مطابق آرمی چیف کو حیدر ٹینک کی تکنیکی صلاحیتوں کے بارے میں مفصل بریفنگ دی گئی، اسلحے اور دیگر ہتھیاروں کی تیاری کے حوالے سے بھی آگاہ کیا گیا۔
آئی ایس پی آر سےجاری بیان میں کہا گیا کہ آرمی چیف نے ہیوی انڈسٹریل کمپلیکس کے مینوفیکچرنگ شعبوں کا دورہ بھی کیا اور ہیوی انڈسٹریل کمپلیکس میں کام کرنے والے افسروں اور دیگر ورک فورس کے عزم اور شاندار تکنیکی کامیابیوں کو سراہا۔
حیدر ٹینک وار فیئر میدان میں جدید ترین ٹیکنالوجی اور متاثر کن صلاحیت کا حامل ہے جس میں قابل ذکر فائر پاور، تحفظ اور تدبیر کی خصوصیات بھی ہیں۔جدید ترین جدید ٹیکنالوجیز کے ساتھ تیار کردہ، حیدر ٹینک پاکستانی دفاعی صنعت کی دفاعی اختراع میں بہترین کارکردگی کا ثبوت ہے۔
