اسلام آباد(نیوزٹویو)متحدہ قومی موومنٹ (ایم کیو ایم) پاکستان نے متحدہ اپوزیشن کی حمایت کا اعلان کرتے ہو ئے وزیر اعظم عمران خان سے مستعفی ہونے کا مطالبہ کردیا ہے ۔اسلام آباد میں پی ڈی ایم رہنماؤں کے ہمراہ پریس کانفرنس کرتے ہوئے خالد مقبول صدیقی نے کہا کہ ایسے دور کا آغاز کریں جہاں سیاسی اختلاف کو دشمنی نہ سجھاجائے۔ ہمارا آپ کے ساتھ چلنے میں کوئی ذاتی مفاد نہیں ہے۔ خالد مقبول نے کہا کہ معاہدے اور مطالبے کی ایک ایک شق عوام کےلیے ہے۔پاکستان مسلم لیگ ن کے صدر اور قائد حزب اختلاف شہباز شریف کا کہنا ہے کہ عمران خان اکثریت کھوچکے ہیں۔ عمران خان استعفیٰ دے کر نئی روایات قائم کرسکتے ہیں۔صدر مسلم لیگ ن نے کہا کہ یہ اپوزیشن کا متحدہ قومی جلوہ ہے۔ ایم کیو ایم پاکستان کا شکریہ ادا کرتا ہوں۔ جنہوں نے اتحاد کی مضبوطی میں اہم فیصلہ کیا۔شہباز شریف نے کہا کہ پاکستان، سندھ اور کراچی کی ترقی و خوشحالی پیش نظر ہے۔بلاول بھٹو زرداری نے کہا کہ پی پی اور ایم کیو ایم کے تعلقات کا عدم اعتماد سے تعلق نہیں۔ کراچی اور پاکستان کی ترقی کےلیے محنت کرنی ہے۔پی پی چیئرمین نے کہا کہ ایم کیوایم اور پیپلزپارٹی کی دوریوں کی سازش سے پورے پاکستان کا نقصان ہوا۔ مل کر کراچی اور پاکستان کی ترقی کےلیے قدم اٹھائیں گے۔بلاول بھٹو نے کہا کہ ایم کیو ایم پاکستان اپوزیشن کی صف میں شامل ہوچکی۔ جس کے بعد وزیراعظم کی اکثریت مکمل طور پر ختم ہوچکی ہے۔انہوں نے کہا کہ وزیر اعظم کے پاس کوئی آپشن نہیں رہا، استعفیٰ دینا ہے۔ کل ہی ووٹنگ کروائیں، اس معاملے کو انجام تک پہنچائیں۔بلاول بھٹو نے کہا کہ جمہوریت کی بحالی، معاشی بحران سے نکلنےکا سفر شروع کرنا ہے، جمہوری ہتھیار اپنا کر ان کے خاتمےکا بندوبست کیا۔پاکستان ڈیمو کریٹک موومنٹ ( پی ڈی ایم ) کے سربراہ مولانا فضل الرحمان کا کہنا ہے کہ عالمی سازش اس وقت ہوئی تھی ، جب عمران خان کو لایا گیا تھا۔
