اسلام آباد(نیوزٹویو) محکمہ موسمیات کی پیش گوئی کے بعد آج مری اور ملک کے دیگر علاقوں میں برف باری کا نیا سلسلہ شروع ہو گیا ہے
برفبادی کا سلسلہ شروع ہونے کےبعد اسلام آباد سے برفباری دیکھنے مری جانے والے سیاحوں کا داخلہ دوبارہ بند کر دیا گیا ہے۔
ڈپٹی کمشنر اسلام آباد عرفان نواز میمن کے مطابق مری میں سیاحوں کی تعداد میں اضافہ دیکھنے میں آیا ہے۔ کسی ایمرجنسی صورتحال سے بچنے کے لیے پیشگی اقدامات کے تحت مزید سیاحوں کا مری میں داخلہ بند کیا گیا۔
دوسری جانب شہریوں کی جانب سے ویکنڈ مری میں گزارنے کی منصوبہ بندی کر لی گئی تھی۔
محکمہ موسمیات نے 3 اور 4 فروری کو مری میں دوبارہ برفباری کی پیش گوئی کی تھی جس کے بعد سیاحوں نے ہفتہ وار چھٹیاں مری میں گزارنے کی منصوبہ بندی کی تھی۔
ضلعی انتظامیہ کے مطابق کے مطابق ایک بار پھر 17 میل کے مقام سے سیاحوں کا مری میں داخلہ روکا گیا ہے۔ مری اور گرد و نواح کے مقامی شہری اپنا شناختی کارڈ دکھا کر مری جا سکتے ہیں۔
ڈپٹی کمشنر اسلام آباد کے مطابق مری میں سیاحوں کا داخلہ دوبارہ بند کرنے کا فیصلہ مری انتظامیہ کی مشاورت سے کیا گیا ہے۔ مری میں اس وقت سیاحوں کا کافی رش ہے۔ مری انتظامیہ کے مطابق سیاحوں کی تعداد میں غیر معمولی اضافے سے مسائل جنم لیتے ہیں۔
اسلام آباد انتظامیہ نے بتایا کہ مری کی صورتحال پر مقامی انتظامیہ سے رابطے میں ہیں۔ رش میں کمی ہونے کی صورت میں مزید سیاحوں کو داخل ہونے کی اجازت دے دی جائے گی۔
محکمہ موسمیات کے مطابق ملکہ کوہسار مری میں 3 اور 4 کو برفباری کا سلسلہ جاری رہنے کا امکان ہے۔ اس کے علاہ ملک کے دیگر پہاڑی علاقوں میں بھی برف باری کی پیش گوئی کی گئی ہے۔
صوبائی ڈیزاسٹر مینجمنٹ اتھارٹی نے مری میں برف باری کے دوران مقامی انتظامیہ کو الرٹ رہنے کی ہدایت کی ہے۔ پی ڈی ایم اے کے مطابق سڑکوں کی بروقت صفائی اور احتیاطی تدابیر پر عمل درآمد یقینی بنایا جائے۔
اس سے قبل مری میں 31 جنوری تک جاری رہنے والے برفباری کے دوران ایک فٹ تک برفباری ریکارڈ کی گئی تھی۔ اسلام آباد کی ضلعی انتظامیہ نے اُس دوران بھی مری میں سیاحوں کا داخلہ بند کر دیا تھا۔
